Allskonar skólastarf fyrir jól

Fyrir hátíðirnar er mikilvægt að brjóta upp hefðbundið skólastarf en vinna áfram að markmiðum námskrár. Það er í mörg horn að líta og ýmislegt sem þarf að ljúka til að halda Litlu jólin sem eru á morgun þriðjudag.

Fyrir hátíðirnar er mikilvægt að brjóta upp hefðbundið skólastarf en vinna áfram að markmiðum námskrár. Það er í mörg horn að líta og ýmislegt sem þarf að ljúka til að halda Litlu jólin sem eru á morgun þriðjudag.

Venju samkvæmt sýndu nemendur 1. bekkjar helgileik á sal fyrir samnemendur sína og foreldra. Uppsetning á helgileiknum er áragömul hefð. Nemendur 6. & 7. bekkjar sóttu jólatréð sem prýðir salinn en það vegleg fura úr Melnum. Að því loknu gæddu nemendur sér á heitu kakói. Á unglingastigi var jólaþema þar sem nemendur gátu valið sér verkstæði til að vinna á s.s. að búa til heimasmíðaða poppvél, perla eða mála jólakrukku.

Fastir liðir eru jólasöngsalir þar sem nemendur koma saman á sal og syngja jólalögin. Það finnst nemendum allajafna hin besta skemmtun. Í jógatímum var unnið með jólaepli í eplajóga. Margir nemendur hafa horft saman klassískar á jólakvikmyndir. Síðastliðinn fimmtudag gæddu nemendur og starfsfólk sér á jólalambinu, gamaldags steikt læri í ofni með sultu og grænum baunum og fleira góðgæti.

Í dag var svo jólafatadagur þar sem allir áttu að mæta í einhverjum jólafatnaði. Jólapeysur, jólabuxur, jólasokkar og svo margt fleira einkenndi fólkið í Borgarhólsskóla í dag. Nemendum bauðst að koma með smákökur í nesti í dag sem gladdi marga.