Grease

Nemendur í 7. bekk eru að sýna söngleikinn Grease á Skólasamkomu Borgarhólsskóla 2007.   Þetta er frábær sýning sem enginn ætti að láta fram hjá sér fara. Sýningar verða 20. 21. og 22. mars kl. 20. Miðaverð er 1000 kr. fyrir fullorðna 500 fyrir nemendur skólans og frítt fyrir yngri. Allur ágóði af sýningunni fer í ferðasjóð 7. bekkjar.  Á skólasamkomunni eru einnig atriði frá öðrum nemendum skólans.

Hér má lesa pistill frá Kristjönu Maríu leikstjóra

Síðasti einn og hálfur mánuður hefur verið þétt setinn leik- og söngæfingum hjá nemendum í 7. bekk hér í Borgarhólsskóla. Ákveðið var að setja upp söngleikinn fræga Grease, sem gerður var eftir samnefndri bíómynd, þar sem John Travolta og Olivia Newton-John slógu svo eftirminnilega í gegn. Þessi leikútgáfa er eftir Maríu Sigurðardóttir sem oft hefur leikstýrt nemendum hér við skólann.  

 

Mikil tónlist er í sýningunni sem flestir, ef ekki allir ættu að kannast vel við. Eflaust verður mikið um raul og dansfíling í stúkunni meðan á sýningunni stendur. Í ár erum við svo heppin að hafa hljómsveit með okkur sem sér um allan undirleik. Það gerir sýninguna meira lifandi og nemendur hafa fengið góða þjálfun í því að syngja með hljómsveit á bak við sig. Sviðið í ár er stórt og mikið, enda þarf að koma mörgum þar fyrir. Sennilega hafa aldrei verið sett upp eins mörg ljós hér í salnum svo áhorfendur ættu ekki að verða sviknir með lýsinguna.