Nýr fuglavefur opnaður

16.04.2008
Nýr fuglavefur opnaður
Um langt skeið hafa ýmsir kennarar Borgarhólsskóla, áður Barnaskóla Húsavíkur, lagt sig sérstaklega eftir því að glæða áhuga nemenda á fuglum...
Um langt skeið hafa ýmsir kennarar Borgarhólsskóla, áður Barnaskóla Húsavíkur, lagt sig sérstaklega eftir því að glæða áhuga nemenda á fuglum. Á skólasafninu er vísir að fuglasafni, góðar fuglabækur og annar fróðleikur um fugla. Í   áratugi  hafa safnakennarar skólans, fyrst Arnheiður Eggertsdóttir síðar Björg Sigurðardóttir, staðið fyrir árlegri skráningu á komu farfugla.
Oft hefur skólinn efnt til fuglaskoðunar með nemendum, m.a. við Mývatn og Laxá. Þegar líður að vori hefur tíðkast að vinna margvísleg fuglaverkefni sem jafnan eru á boðstólum á skólasafninu og einstökum bekkjum. Árlega hafa nokkrir nemendur orðið „sérfræðingar“ um fugla enda eru margir áhugasamir fuglaskoðarar á Húsavík. Fuglavefur Borgarhólsskóla var smíðaður til heiðurs  Arnheiði Eggertsdóttur fyrrum kennara skólans en hún glæddi áhuga margra nemenda á fuglum þann langa tíma sem hún starfaði við skólann.  Á fundi í Borgarhólsskóla síðasta vetrardag,  þann 20. apríl 2005,  að viðstöddum kennurum og gestum, opnaði Arnheiður vefinn.   Nú hefur vefurinn verið endurhannaður og settur upp með annarri tækni í  samstarfi Óskars Birgissonar fyrrum vefstjóra skólans. Við munum leita í smiðju til áhugamanna hér um slóðir, m.a. Náttúrustofu Norðurlands eystra á Husavík,  með fuglafréttir og hugleiðingar af ýmsu tagi.

Óska þess að fuglavefur Borgarhólsskóla glæði áhuga fyrir fuglum og verði til þess að nýir ,,sérfræðingar“ og annað áhugafólk bætist í hóp fuglavina. 
 
Halldór Valdimarsson skólastjóri
Til baka

Athugasemdir