Skólatöskudagar

Iðjuþjálfar heimsækja grunnskólabörn og vigta skólatöskur

Iðjuþjálfafélag Íslands stendur fyrir Skólatöskudögum víðs vegar um landið dagana 26. til 30.september sem bera yfirskriftina ,,Létta leiðin er rétta leiðin”. Skólatöskudagar eru haldnir af iðjuþjálfum um allan heim í september að bandarískri fyrirmynd. Síðastliðið haust tóku 52 iðjuþjálfar og iðjuþjálfanemar þátt í verkefninu. Farið var í 28 skóla og voru alls 1237 nemendur sem tóku þátt.

Hér hjá okkur í Borgarhólsskóla munum við fara í 1., 4. og 7. bekk. Að þessu sinni eru tveir iðjuþjálfanemar að aðstoða Írisi og Marzennu við fræðslu um skólatöskurnar og vigtun þeirra. 

Á Skólatöskudögum fræða iðjuþjálfar nemendur, foreldra og kennara um rétta notkun á skólatöskum. Nemendur fá að vigta skólatöskurnar sínar og reikna út hvort skólataskan sé af æskilegri þyngd miðað við þeirra eigin líkamsburði. Börnin fá einnig í hendurnar leiðbeiningar um hvernig taskan á að vera stillt, hvernig best sé að raða í hana og hvaða þætti er mikilvægt að horfa á þegar ný taska er keypt. Iðjuþjálfarnir munu auk þess veita almenna fræðslu um rétta líkamsbeitingu, en stoðkerfisvandi barna og ungmenna er vaxandi vandamál og forvarnir geta bætt líðan þeirra. 

Iðjuþjálfar hafa sama markmið að leiðarljósi og kennarar: Að gera allt sem við getum til að nemendum líði vel í skólanum. Iðjuþjálfar aðstoða börn með víðtæka færnivanda svo sem varðandi skrift, þroska og hegðun. Iðjuþjálfar vinna að því að styrkja einstaklinga í daglegum athöfnum svo þátttaka þeirra sé með besta móti. Einnig huga iðjuþjálfar að vinnuvistfræði, s.s. setstöðu og líkambeitingu.