Fréttir

Landnám Íslands hefur sterka tengingu við Húsavík. Nemendur í öðrum og þriðja bekk hafa verið að rannsaka og læra um landnám Íslands. Þar er lögð áhersla á Húsavík, hinn sænska Garðar Svavarsson og þrælinn hans, Náttfara.

Lús hefur nú greinst innan allra árganga í skólanum. Höfuðlúsin er lítið skorkvikindi sem hefur aðlagað sig manninum og lifir sníkjulífi í mannshári á höfði og nærist á því að sjúga blóð úr hársverðinum. Hún er ekki talin bera neina sjúkdóma og því skaðlaus hýslinum. Foreldrar eru beðnir um að tilkynna um lúsasmit í skólann. Búið er að senda leiðbeiningarbækling á nokkrum tungumálum á hvert heimili.

Nemendur sjöunda bekkjar þreyttu samræmt könnunarpróf í íslensku og stærðfræði í gær og dag. Prófin eru venju samkvæmt tekin í spjaldtölvu. Fyrirlögn gekk reglulega vel. Nemendur mættu jákvæðir og afslappaðir til leiks og gerðu sitt besta.

Nemendur áttunda, níunda og tíunda bekkjar fóru á sýningu í Gamla Samkomuhúsinu í dag. Þar fór fram einleikurinn Velkomin heim eftir Maríu Thelmu Smáradóttur, í leikstjórn Köru Hergils og Andreu Vilhjálmsdóttur. Í sýningunni tvinnar leikkonan María Thelma Smáradóttir saman sögu móður sinnar sem fæddist á hrísgrjónaakri í Taílandi og sína eigin sögu. Hún fjallar um tvo ólíka menningarheima sem mætast, þann íslenska og þann tælenska.

Þegar bæjarbúar vakna að morgni og ganga til vinnu sinnar er sprúðlandi fuglasöngur í hverju tré. Skógarþrestir fljúga á milli trjánna og kannski orðnir heldur kenndir enda reyniberin víða orðin ansi þroskuð.

Viðfangsefni nemenda í níunda bekk í náttúrugreinum var næringarfræði í liðinni viku. Eitt af viðmiðum aðalnámskrár er að nemendur geti útskýrt hvernig einstaklingur geti stuðlað að eigin velferð með ábyrgri neyslu og hegðun. Næringarfræðin er liður í þeirri kennslu.

Það er árviss viðburður að nemendur skólans fari í lengri gönguferðir og njóti útiveru með skipulögðum hætti í upphafi hvers skólaárs. Verkefnið er liður í að fagna degi íslenskrar náttúru sem er haldinn 16. september ár hvert.

Nemendur í fyrsta bekk finna ýmislegt áhugavert á skólalóðinni. Þeir fundu geitung fyrir nokkrum dögum og vildu rannsaka hann betur. Nemendur fengu örkennslustund þar sem stærðir hluta voru skoðaðar, allt frá stærstu stjörnuþokum niður í bylgjulengdina inn í örbylgjuofninum. Sömuleiðis skoðuðu þeir geitunginn góða í smásjá.

Þrátt fyrir rigningu í morgun og suddaveður var Borgarhólsskóli skráður til leiks í verkefnið Göngum í skólann. Göngum í skólann er hluti af verkefninu ,,Virkar og öruggar leiðir í skólann", sem nýtur stuðnings "Go for Green" og annarra samstarfsaðila.

Elstu nemendur Grænuvalla komu í heimsókn í morgun og fóru ásamt nemendum í fyrsta, öðrum og þriðja bekk á leiksýninguna Björt í sumarhúsi í Salnum. Verkið er söngleikur fyrir börn eftir Elínu Gunnlaugsdóttur við texta Þórarins Eldjárns sem byggir á ljóðum úr bókinni ,,Gælur, fælur og þvælur”.