Fréttir

Nýlega tóku nemendur í tíunda bekk þátt í evrópskri vímuefnarannsókn (ESPAD). Rannsóknin heufr verið lögð fyrir íslensk ungmenni í aldarfjórðung og því til gríðarlega mikið af upplýsingum um vímefnanotkun íslenskra ungmenna. ESPAD rannsóknin er gerð á fjögurra ára fresti, víðsvegar um Evrópu og eru þátttakendur grunnskólabörn á aldrinum 15-16 ára (ESPAD, 2018). Markmið rannsóknarinnar er að skoða vímuefnaneyslu unglinga á Íslandi, með tilliti til samskipta þeirra við foreldra. Vímuefnaneysla er hér notað sem yfirheiti yfir áfengisneyslu og öll önnur ávanabindandi efni.

Hluti af skólastarfi og einn lykilþáttur þess er lýðræði. Einn lítill liður í því er að nemendur fá að velja hvernig matseðill skólans lítur út. Eftir áramót fékk hver árgangur að velja eina máltíð sem skyldi höfð á matseðli einhvern daginn til vors.

Undanfarin ár hafa heldri einstaklingar, afar og ömmur komið með reglulegum hætti í heimsókn í skólann til að hlusta á nemendur lesa. Verkefnið er kallað lestrarafar- og -ömmur og gefist reglulega vel. Nú eru átta til tíu einstaklingar sem sinna þessu sjálfboðaliðastarfi með sóma. Við kunnum þeim bestu þakkir fyrir.

Lokahátíð Stóru upplestrarkeppninnar fór fram í dag Safnahúsinu á Húsavík. Tíu ungmenni úr 7. bekk úr Borgarhólsskóla, Þingeyjarskóla, Grunnskólanum á Þórshöfn og Öxarfjarðarskóla komu fram og fluttu mál sitt fyrir gesti.

Undanfarin ár höfum við skráð kyn foreldra og aðstandenda í samtali heimilis og skóla. Konur mæta einar í viðtal í 45% tilfella. Saman mæta foreldrar í 44% tilfella og 11% feður einir. Það er breyting frá því í síðasta samtali þegar mæður mættu einar í 54% tilfella. Það fjölgar lítillega feðrum sem mæta einir og sömuleiðis að foreldrar mæti saman í viðtal.

Forinnritun nemenda í 10. bekk (fæddir 2003 eða síðar) hefst í dag föstudaginn 8. mars og lýkur mánudaginn 12. apríl. Nemendur fengu afhent bréf frá Menntamálastofnun sem inniheldur leiðbeiningar um umsóknarferlið og veflykil sem gengur að umsókn á Menntagáttinni. Foreldrar/forráðamenn nemenda fá bréf frá Menntamálastofnun með upplýsingum um innritunina sent á lögheimili sitt. Nemendur í 10. bekk eru eindregið hvattir til að taka þátt í forinnrituninni.

Í vikunni fór fram skólasamkoma skólans. Þar frumsýndi sjöundi bekkur leikritið Annie í leikstjórn Ástu Magnúsdóttur og Karenar Erludóttur. Viðtökur voru mjög góðar og var fullt úr úr dyrum á samkomunni. Þess vegna hefur verið ákveðið að bjóða upp á tvær aukasýningar næstkomandi mánu- og þriðjudag klukkan áttánhundruð.

Það er rík hefð fyrir skólasamkomu í skólanum. Þar koma nemendur fram með atriði, dans og söng. Samkoman er liður í fjáröflun nemenda sjöunda bekkjar sem fer í skólabúðir í Mývatnssveit. Dagskráin er fjölbreytt að vanda.

Bæði nemendur áttunda og tíunda bekkjar hafa verið að fjalla um flóttafólk í samfélagagreinum. Þá er unnið með skilgreiningar á hugtökum eins og kvótaflóttafólk, efnahagsflóttafólk og leitað skýringa á hvers vegna fólk er á flótta en um 60 milljónir manna eru á flótta víða á Jörðinni. Nemendur hafa kannað hvernig flóttafólk ferðast, hvar það leitar skjóls og hvert förinni er heitið.

Í gær fór fram undankeppni skólans vegna Stóru upplestrarkeppninnar. Verkefnið sjálft hefst ár hvert á degi íslenskrar tungu, 16. nóvember. Fimmtán nemendur 7. bekkjar öttu kappi í upplestri. Það eru Raddir, samtök um vandaðan upplestur og framsögn sem standa fyrir keppninni á landsvísu en umsjón með verkefninu er í höndum skólaskrifstofa í hverju héraði.