Börn eiga rétt á að njóta öryggis og verndar gegn skaðlegu efni í fjölmiðlum. Fullorðnir bera ábyrgð á að börn fái að kynnast ólíkum miðlum og þeim tækifærum sem í þeim felast. Um leið þarf að kenna börnum að verjast skuggahliðum miðlanna og tileinka sér gagnrýna hugsun gagnvart þeim skilaboðum sem þar er að finna.

Okkar bestu óskir um gleðilega jólahátíð. Megi nýtt ár færa ykkur gæfu og gleði. Þökkum gott samstarf á liðnu ári. Jólakveðja, starfsfólk Borgarhólsskóla. Kennsla hefst að óbreyttu á nýju ári þriðjudaginn 3.janúar skv. stundaskrá.

Á hverju ári má gera ráð fyrir að Íslendingar; fólk á vinnustöðum eða nemendur í jólapúkki verji hundruðum þúsunda í smágjafir til að gefa og þiggja. Undanfarin ár hafa nemendur haldið pakkapúkk fyrir jólin og skipst á gjöfum. Gildi þessarar hefðar hefur dvínað. Við viljum engu að síður nýta kraftinn sem býr í hugtakinu, sælla er að gefa en þiggja. Sem dæmi; ef starfsfólk Borgahólsskóla heldur jólapúkk þar sem hver kemur með glaðning að upphæð 2500 krónur væri það andvirði 172.500 króna. Margt smátt gerir eitt stórt.

Litlu jólin eru notaleg hefð í mörgum grunnskólum landsins. Þau voru nú með hefðbundu sniði og án takmarkana sem er ánægjulegt. Í upphafi dags komu allir nemendur skólans saman á söngsal og var öllum boðið upp á kakó í dag. Nemendur spiluðu, tók þátt í bingó og hittu jólasveinana úr Dimmuborgum sem sprelluðu með nemendum á Sal og kringum jólatré skólans.

Valgreinar eru hluti af skyldunámi. Í 8., 9. og 10. bekk grunnskóla skal nemendum gefinn kostur á að velja námsgreinar og námssvið sem svarar allt að þriðjungi námstímans. Tilgangurinn með valfrelsi nemenda á unglingsstigi er að laga námið sem mest að þörfum einstaklingsins og gera hverjum og einum kleift að leggja eigin áherslur í námi miðað við áhugasvið og framtíðaráform í samvinnu við foreldra, kennara og námsráðgjafa. Val í námi skal miða að skipulegum undirbúningi fyrir nám í framhaldsskóla og taka mið af undirbúningi fyrir bóknám, starfsmenntun, list- og tækninám.

Í morgun var opni jólasöngsalurinn í skólanum. Öllum nemendum býðst að koma og syngja jólalögin sem og gestum og gangandi. Við þökkum þeim sem komu að syngja með okkur kærlega fyrir komuna. Sérstaklega nemendum af leikskólanum Grænuvöllum sem kíktu í heimsókn á jólasöngsal. Nemendur tóku vel undir í söng og hægt að komast í jólaskapið undir ljúfum jólatónum.

Nemendur sjötta og sjöunda bekkjar tóku þátt í aðventubocciamóti í dag. Mótið er nú haldið í annað sinn. Þátttaka var mjög góð og var keppt í þremur riðlum. Markmiðið með mótinu er að skapa ánægjulega samveru og gleðistundir. Allir keppendur fengu þátttöku verðlaun sem var hin glæsilegasta bollakaka. Starfsfólk Íþróttahallinnar aðstoðuðu við dómgæslu. Vonandi er mótið hluti af komutíma jóla og fastur liður í skólastarfinu fyrir jól.

Nemendur þriðja bekkjar fengu nýlega góða heimsókn frá Eldvarnareftirliti og Slökkviliði Norðurþings. Þeir Henning Aðalmundsson, aðstoðarslökkviliðsstjóri og Rúnar Traustason, varðstjóri voru með fræðsluerindi um eldvarnir. Fyrir jól er fólk hvatt til að skipta um batterí í reykskynjurum, huga að kertaskreytingum o.fl.

Það er löng hefð fyrir Verkstæðisdeginum í Borgarhólsskóla. Skólastarfið er með afar óhefðbundu sniði þann daginn, nemendur mæta með foreldrum, öfum og ömmum, systkinum, frændum og frænkum. Skólinn er öllum opinn þennan skemmtilega dag.

Fyrir jól er hefðbundið skólastarf gjarnan með fjölbreyttari hætti. Sköpunarþrá á sér rætur í meðfæddri forvitni, athafnaþrá og stuðlar að frumkvæði einstaklingsins. Sköpunargleði leiðir til námsáhuga þegar börn og ungmenni skynja merkingu viðfangsefnanna og gildi þeirra.